Башкарма комитет җитәкчесе Фәрит Сәлахов һәм Комсомол районы башлыгы Ленар Әхмәтҗанов шәһәрнең Мактаулы гражданины, Бөек Ватан сугышы ветераны Мөфтәх Ансап улы Нуртдиновта кунакта булдылар. Мөфтәх Ансап улы кунакларны традиция буенча үз өе бусагасында каршы алды.
Очрашуның иң дулкынландыргыч мизгеле 39 нчы башлангыч мәктәп укучылары белән булды – балалар ветеран өчен җырлар башкардылар, ә үзе дә җырларга яраткан ветеран алар белән кушылып җырлады һәм яшь буынга рәхмәтен җиткерде. Фронтовик сугыш елларындагы истәлекләре белән уртаклашты, үзенең сугышташлары турында сөйләде һәм балаларга тынычлык, игелек теләде.
Быел, 24 июльдә, Мөфтәх Ансап улы үзенең гасырлык юбилеен билгеләп үтәргә әзерләнә.
Мөфтәх Нуртдинов Башкортстан Республикасы Шарлык районы Зирекле авылында туган. 1941 елда, сугыш башлангач, 15 яшьлек үсмер булуына карамастан, колхозда эшли башлый. 1943 елның ноябрендә фронтка алына, җәяүле гаскәр полкында сугыша, Румыния, Чехословакия, Венгрия һәм Австрияне азат итүдә катнаша.
Сугыштан соң 20 елдан артык Мөфтәх Ансап улы вахта автобусы йөртүчесе булып эшли, бораулаучыларны эшкә ташый. 1973 елда чакыру буенча КАМАЗ төзелешенә Яр Чаллыга килә. Биредә «Камгэсэнергострой»ның СУМ-1 оешмасында экскаваторчы булып эшли, киләчәк объектлар өчен котлованнар казый, шул исәптән КАМАЗ ТЭЦы өчен, һәм шәһәребезнең торба үткәргечләре өчен траншеялар казый.
Тормыш иптәше белән бергә өч бала үстергәннәр, Мөфтәх Ансап улының 5 оныгы һәм 2 оныкчыгы бар.
Ветеранның бүләкләре арасында: «Батырлык өчен», «II дәрәҗә Ватан сугышы», «Германияне азат иткән өчен», «Хезмәт батырлыгы өчен», «Будапештны азат иткән өчен» медальләре бар.
Шәһәр Мөфтәх Ансап улына аның батырлыгы, хезмәте һәм без барыбызга да күрсәткән үрнәге өчен рәхмәт белдерә.