2025 ел нәтиҗәләре буенча шәһәр бюджеты тотрыклы үсеш күрсәтте: керемнәр узган ел белән чагыштырганда үз керемнәре исәбенә дә, югары торучы бюджетлардан кергән бушлай трансфертлар ярдәмендә дә артты, дип хәбәр итте Башкарма комитет җитәкчесе урынбасары, финанс идарәсе башлыгы Светлана Мөлекова. Салым һәм салым булмаган керемнәр буенча планлы билгеләмәләр сизелерлек артык үтәлде.
Үз керемнәренең төп үсеше физик шәхесләрдән алынган керем салымы (НДФЛ), патент салым салу системасы һәм салым булмаган түләүләр исәбенә тәэмин ителде. Үз керемнәр структурасында НДФЛ өлеше өстенлек итә. Мөлкәт салымнары буенча керемнәр тотрыклы дәрәҗәдә сакланды, шул ук вакытта җир салымы буенча кишәрлекләрнең кадастр бәясен яңадан бәяләү белән бәйле аз гына кимү билгеләнде.
Салым булмаган керемнәр башлыча җир өчен аренда түләүләре исәбенә артты. Акчаларның үз вакытында килүе бюджет өлкәсе тармакларын тулы күләмдә финансларга һәм барлык кабул ителгән йөкләмәләрне үтәргә мөмкинлек бирде.
«Керемнәрнең үз вакытында килүе шәһәрнең бюджет өлкәсе тармакларын финанслауны тәэмин итәргә һәм шуның белән барлык кабул ителгән бюджет йөкләмәләрен үтәргә мөмкинлек бирде. Без бюджетның социаль юнәлешен саклыйбыз: мәгарифкә, мәдәнияткә, спортка һәм гражданнарга ярдәм итүгә барлык чыгымнарның 67%-тан артыгы юнәлдерелде», – дип билгеләп үтте Светлана Мөлекова.
Чыгымнар структурасында гадәттә хезмәткә түләү фонды өстенлек итә. Бюджетның зур өлеше торак-коммуналь хуҗалыкка, муниципаль милекне тотуга һәм социаль түләүләргә юнәлдерелгән. Социаль-мәдәни өлкәгә барлык чыгымнарның өчтән ике өлешеннән артыгы бүлеп бирелгән – бу үсеш яңа мәктәп ачылу, минималь хезмәт хакының артуы һәм тармак белгечләренең хезмәт хакларын индексацияләү белән бәйле.
2026 елда акча калдыкларын төп юнәлешләргә: мәгариф оешмаларын саклауга, ташучыларның зыяннарын каплауга, тышкы төзекләндерү объектларын төзекләндерү һәм ремонтлауга, муниципаль хезмәткәрләрнең хезмәткә түләү фондын тәэмин итүгә, спорт объектларының терроризмга каршы иминлегенә, «Имин шәһәр» системасын хезмәтләндерүгә, трамвай линиясенең проект документларын эшләүгә, суд карарларын үтәүгә юнәлтергә планлаштырыла. Шулай ук мәгарифне, спортны, мәдәниятне һәм территориаль җәмәгать үзидарәләрен яклау өчен бюджетара трансфертлар да исәпкә алынган.
Мэр Наил Мәһдиев хезмәт коллективларына, предприятиеләр, оешмалар һәм учреждениеләр җитәкчеләренә, беренче чиратта – КАМАЗга, шулай ук кече һәм урта бизнес вәкилләренә рәхмәт сүзләрен җиткерде. Ул кече һәм урта эшкуарлык субъектлары җирле бюджет керемнәренең 35% ын формалаштыруын һәм бу өлкәдә 114 мең кеше эшләвен, бу зур икътисади көч булуын ассызыклады. Шул ук вакытта КАМАЗ, шәһәр төзүче предприятие буларак, бюджетның нигезе булып кала.
Мэр социаль йөкләмәләрнең күләменә игътибар итте – шәһәрдә 200дән артык мәгариф учреждениесе, мәктәпләр, балалар бакчалары, өстәмә белем бирү учреждениеләре эшли.
«Шуңа күрә без бюджетның керем өлешен үз вакытында һәм төгәл формалаштырырга бурычлы – сумга-сум. Бу салым һәм салым булмаган керемнәргә кагыла. Безнең казнаны тулыландыру өчен җитди резервларыбыз бар, аерым алганда, 200 миллион сумнан арткан бурычлар белән эшләү. Кызганычка каршы, кайбер предприятиеләр тарафыннан керем салымы һәм мөлкәт салымнарын вакытында түләмәү өлеше үсә, һәм бу хәлне үзгәртергә кирәк».
Шәһәр Советы депутатлары бюджетның үтәлеше турындагы отчетны расладылар һәм аның параметрларына үзгәрешләр кертүне бертавыштан хупладылар.