Башкарма комитет җитәкчесе урынбасары Наталия Кропотова 2023 елга һәм 2025 елга кадәр планлы чор өчен шәһәрнең социаль-икътисади үсеш фаразын тәкъдим итте.
Ел йомгаклары буенча тулай территориаль продукт 331,1 млрд сум тәшкил итәчәк, чагыштырма бәяләрдә – 98,5%. Уртача вакытлы чорда тулай территориаль продуктны формалаштыруны икътисадның төп секторлары: сәнәгать, төзелеш, күпләп һәм ваклап сату тәэмин итәчәк.
2023 елда тулай территориаль продукт күләме 344,6 млрд сум тәшкил итәчәк.
2022 ел бәяләмәсе буенча шәһәрнең сәнәгать предприятиеләре тарафыннан үз җитештерү продукциясе төяп озатылачак, үз көчләре белән 593,2 млрд сумлык эшләр һәм хезмәтләр башкарылачак.
Төп капиталга инвестицияләр күләме агымдагы ел ахырына 64,4 млрд сум күләмендә планлаштырыла, бу 2021 ел дәрәҗәсенең 96,2%ын тәшкил итә.
2022 ел бәяләмәсе буенча торакны файдалануга тапшыру 330,0 мең кв.метр тәшкил итәчәк, бу 2021 ел дәрәҗәсеннән 2,3%ка югарырак.
2023 елда торакны файдалануга тапшыру агымдагы ел дәрәҗәсендә булыр дип фаразлана.
Башкарма комитет җитәкчесе урынбасары Светлана Мөлекова бюджет проектын тәкъдим итте, ул инде җәмәгать тыңлаулары узды һәм Шәһәр Советы комиссияләре утырышларында каралды. Шәһәрнең баш финансисты хәбәр иткәнчә, шәһәр бюджетының фаразланган гомуми керемнәр күләме 14 534 575,96 мең сум; шәһәр бюджетының гомуми чыгымнар күләме 14 534 575,96 мең сум тәшкил итә.
Шәһәр бюджетында мәктәп укучыларын туклану белән тәэмин итү, мәктәпкәчә белем алу өчен түләү, ятим балаларны карап тоту һәм башка хезмәтләр өчен чыгымнар планлаштырылган. Моннан тыш, хәрби хезмәткә бурычлыларның балаларын карап тоту өчен чаралар бүленгән: балалар бакчалары өчен түләү, мәктәпләрдә туклану, түгәрәкләр өчен түләү һәм Яңа елга бүләкләр.
«Бюджет проекты социаль юнәлештәгедән дә артыграк, – дип ассызыклады шәһәр башлыгы. – Бакча-огородларга йөрү, хезмәт хакы түләү, шәһәр юлларын, паркларны һәм скверларны карап тоту чаралары исәпкә алынган. Яр Чаллы – донор-шәһәр, без республика һәм федераль бюджетларын тулы күләмдә формалаштырабыз».
Наил Мәһдиев шәһәр үсеше фаразын төзегәндә яңа сәяси үзгәрешләрнең дә исәпкә алынуын билгеләп үтте. «Киләсе елның ничек булачагын тормыш күрсәтер. Без дә 2021 елда социаль-икътисади үсеш фаразын кабул иткәндә, 2022 елда нәрсә булачагын уйламаган идек. Партнерларыбызның китәчәген беркем дә уйламаган. Ләкин булганы булды. Партнерлар китте. Шәһәр икътисады күптән инде дөнья икътисадына интеграцияләнгән. Фаразны формалаштырганда, без бу чакыруларның барысын да исәпкә алабыз».