Россия Пенсия фонды Идарәсе хәбәр иткәнчә, 2 марттан башлап ана капиталыннан айлык түләүне озайтуның бер ел элек коронавирус таралу һәм шуннан соң булган чикләүләр аркасында кертелгән вакытлы тәртибе гамәлдә булмаячак. Узган елның апреленнән бүгенге көнгә кадәр тапшыру срогы тәмамланган гаиләләргә түләүләр автомат рәвештә Россия Пенсия фонды тарафыннан ата-аналардан гаризасыз һәм гаилә керемнәре расланмыйча озайтылды.
Гаризаларны фонд порталында яки дәүләт хезмәтләре порталында Шәхси кабинет аша бирергә мөмкин. Сертификат хуҗасының яки аның вәкиленең гаризасы шулай ук Россия Пенсия фондының барлык клиент хезмәтләрендә һәм мондый хезмәт күрсәтүче күп функцияле үзәкләрдә кабул ителә.
Исегезгә төшерәбез, ана капиталыннан айлык түләү икенче балага өч яшь тулганчы гаиләгә бирелә. Һәр түләү чоры бер елга исәпләнгән. Икенче балага бер яки ике яшь тулган саен сертификат хуҗасына гаиләнең түләү хокукын раслау өчен Пенсия фондына мөрәҗәгать итәргә кирәк. Гаризадан тыш, моның өчен ата-аналарның һәм балаларның керемнәре турында белешмәләр кирәк булачак, алар бер кешегә аена ике яшәү минимумыннан артмаска тиеш.
Шуңа да карамастан, күпчелек гаиләләргә үз керемнәрен бүтән расларга туры килмәячәк, чөнки быелдан Пенсия фонды әлеге мәгълүматларны мөстәкыйль рәвештә җыя. Мәгълүмат Фондның үз мәгълүматларыннан, социаль тәэмин итүнең бердәм мәгълүмат системасыннан (ЕГИССО) һәм ведомствоара хезмәттәшлек системасыннан алына, анда Федераль салым хезмәте мәгълүматлары да керә.
Керемнәрне ата-аналарның берсе хәрби, коткаручы, полицейский яки башка көч ведомствосы хезмәткәре булган очракта гына, шулай ук гаиләдә кемдер стипендия, грантлар һәм фәнни яки уку йортының башка түләүләрен алган очракта гына күрсәтергә кирәк булачак.
«Ана капиталыннан түләүгә гаризаны икенче бала туганнан соң өч ел дәвамында теләсә кайсы вакытта бирергә мөмкин. Әгәр Пенсия фондына беренче ярты елда мөрәҗәгать итсәк, акчалар туу яки уллыкка алу датасыннан биреләчәк һәм гаилә аны узган айларда алачак. Алты айдан соң мөрәҗәгать иткәндә, закон нигезендә түләү гариза биргән көннән башлана",- дип билгеләп үтте Татарстан Пенсия фонды башлыгы Эдуард Вафин.
2020 елда ана капиталыннан гаиләләргә айлык түләүләрнең гомуми суммасы үткән ел белән чагыштырганда ике ярым тапкырга арткан һәм 169 млн сумга якын тәшкил иткән.