Г.М. Хәкимова исемендәге Яр Чаллы картиналар галереясында танылган рәссам Лилия Мостафина-Хаҗиеваның күргәзмәсе эшли башлады – бу вакыйга авторның 55 яшьлек юбилеена багышланган һәм 100дән артык эшне үз эченә ала.
Магнитогорск «Почет Билгесе» орденлы дәүләт педагогика институтын тәмамлаган Лилия Мостафина-Хаҗиева күп еллар дәвамында 1 нче балалар сәнгать мәктәбендә укыта, тәрбияләнүчеләре белән сәнгать-белем бирү, конкурс һәм күргәзмә эшләрен алып бара.
Лилия Фаяс кызы – әйдәп баручы рәссамнарның берсе: ул төрле жанрларда уникаль әсәрләр иҗат итә һәм шәһәр, республика сәнгать мәйданында акварель сәнгатен популярлаштыра. Авторның әсәрләре Россия музейлары һәм галереялары җыентыкларында, шулай ук чит ил шәхси коллекцияләрендә саклана. Рәссам үзенең бишенче шәхси күргәзмәсендә 100дән артык акварель һәм живопись әсәрләрен тәкъдим итте.
Тантаналы ачылыш кунакларын картиналар галереясе директоры урынбасары Рүзия Вәлиуллина һәм Татарстанның халык рәссамы Мәдияр Хаҗиев сәламләде. Авторны мәктәп директоры Альбина Шәйхулова һәм шәһәр рәссамнары – хезмәттәшләре котлады. Лилия Фаяс кызына аның тәрбияләнүчеләре аерым рәхмәт белдерделәр.
Күргәзмә 12 апрельгә кадәр дәвам итәчәк.