Яр Чаллы дәүләт педагогика университеты Россия Мәгариф академиясенең яңа Фәнни үзәге өчен мәйданчык булачак, бу «Яшьләр һәм балалар» милли проекты бурычларына туры килә. Бу хакта килешү Яр Чаллы дәүләт педагогика университеты ректоры Әлфинур Галиәкбәрова һәм Россия Мәгариф академиясе президенты Ольга Васильева арасында имзаланды. Чара «Педагогны әзерләү — җәмгыять үсешенең стратегик ресурсы» темасына багышланган педагогик белем бирүне үстерү буенча V Бөтенроссия форумы (халыкара катнаш белән) кысаларында узды.
Үзәкне ачу — төбәктә фәнне үстерү юнәлешендәге стратегик яктан мөһим адым. Фәнни үзәк университет базасында интеграцияләнгән фәнни-методик һәм инновацион үзәк формалаштыруда бәйләүче буын булачак. Аның төп бурычлары: фундаменталь һәм гамәли белемнәр тудыру; Татарстан Республикасы һәм гомумән Россия Федерациясе мәгариф системасының алгарышлы үсеше өчен заманча белем бирү технологияләрен эшләү һәм гамәлгә кертү.
Үзәк төбәктә педагогик фәннең фәнни потенциалын берләштерүгә юнәлтеләчәк һәм мәгариф өлкәсендәге төп чакыруларга җавап бирәчәк. Алар арасында: мәгарифне цифрлы трансформацияләү; тарихи-мәдәни мирасны саклау; куркынычсыз һәм үсеш бирүче белем бирү мохитен формалаштыру; педагогика өлкәсендә халыкара хезмәттәшлекне ныгыту.