Яңа уку елы башыннан һәр дүшәмбе илнең барлык мәктәпләрендә һәм көллиятләрендә һәр «Мөһим сөйләшү» дәресеннән башлана. Дәрес гадәти сыйныф сәгатен хәтерләтә, әмма ул фикер алышу форматында уза һәм аның төп темалары хәзерге Россиядә кеше тормышының төп аспектларына бәйле. Бүген 56 нчы мәктәпнең өлкән сыйныф укучылары өчен дәрес үзенчәлекле булды - аны шәһәр мэры Наил Мәһдиев шәхсән үзе үткәрде. Актлар залында Россия флагы күтәрелде, Россия Федерациясе һәм Татарстан Республикасы Гимннары яңгырады. Бу тантана һәр дүшәмбе көнне Чаллы мәктәпләрендә уза.
Дәрес "Яр Чаллы – мөмкинлекләр шәһәре" темасына әңгәмә форматында үтте. Шәһәр мэры Чаллы тарихы һәм шәһәрнең хәзер нинди якка хәрәкәт итүе турында сөйләде. Укучылар шәһәрнең мәдәни урыннары турында интерактив экскурсия аша белделәр. "Бүгенге сөйләшү темасы олылар өчен дә, укучылар өчен дә мөһим. Шуңа күрә мин килергә һәм күңелемнән сөйләшергә кирәк дип уйладым. Минем уйлавымча, һәркемнең шәһәр җитәкчесенә сораулары бар һәм үз чиратында шәһәр турында, бүгенге мөмкинлекләр турында сезнең фикерегезне ишетергә теләр идем", – диде Наил Мәһдиев.
Шулай ук Наил Мәһдиев өлкән сыйныф укучыларының, мәсәлән, үзенең тормыш юлы, лидерның мөһим күнекмәләре һәм безнең шәһәрдә карьера үсеше мөмкинлекләре турындагы сорауларына җавап бирде. Өлкән сыйныф укучыларының күбесе укуларын нәкъ менә Чаллыда дәвам иттерергә дигән фикердә. Мәсәлән, 56 нчы мәктәптә психологик-педагогик сыйныфлар эшли, аның укучылары – Чаллы педагогия университетының булачак студентлары.