Бүген телемост аша Россия табигать ресурслары һәм экология министры урынбасары Максим Корольков илнең барлык 89 төбәге өчен су объектлары ярларын чүп-чардан чистарту акциясенең яңа сезонына тантаналы старт бирде.
«Ел саен бөек илебезнең миллионлаган кешесе су объектлары ярларында, бергә вакыт үткәрү өчен, саф һавада очраша. Быел без Татарстан Республикасыннан старт алабыз – узган ел үткәрелгән чаралар саны буенча җиңү яулаган акциябез лидерларыннан берсе. Бүген акция илебезнең бөтен иксез-чиксез территориясенә тарала, һәм, әлбәттә, нәтиҗәне без үз күзләребез белән күрәчәкбез», – дип билгеләп үтте ул.
Телемостта илнең сигез төбәге катнашты: Чуаш Республикасы, Донецк халык республикасы, Түбән Новгород өлкәсе, Төньяк Осетия-Алания Республикасы, Иваново өлкәсе, Мәскәү өлкәсе, Самара өлкәсе, Ленинград өлкәсе, шулай ук Татарстанның өч районы: Арча, Алексеевск һәм Минзәлә.
Яр Чаллыда акция Габдулла Тукай яр буенда узды, анда меңләгән кеше катнашты: мәктәп укучылары, волонтерлар, шәһәр активистлары. Сәхнәдән аларга шәһәр мэры Наил Мәһдиев мөрәҗәгать итте, ул урын итеп Габдулла Тукай исемендәге яр буен сайлау очраклы түгел икәнлеген билгеләп үтте. Быел бөек шагыйрьнең тууына 140 ел тула. Моннан тыш, моңа кадәр яр буе Татарстан Республикасы Рәисе Рөстәм Миңнеханов инициативасы белән төзекләндерелгән иде.
«Бүген бу яр буе зур популярлык казанган. Моннан Чулманга матур күренешләр ачыла, монда Мәләкәс елгасы ага, аны без инде федераль акчалар исәбенә чистартабыз һәм тәртипкә китерәбез. Барысы да нәкъ менә монда акцияне башлау өчен туры килде.
Без якындагы киләчәктә барысы да туры килсә, елга порты булдыру проектын гамәлгә ашырырга планлаштырабыз. Минемчә, безнең планнар уңайлы. Финанс һәм сәяси шартлар туры килер һәм без бу территорияне алга таба үстерә алырбыз дип ышанам», – дип бүлеште шәһәр мэры.
Чулман елгасы ярында масштаблы җыештыру үткәрү өчен 1,5 меңнән артык кеше – экологик съездда катнашучылар, волонтерлар һәм шәһәр халкы чыкты. Экофестиваль интерактив зоналарны, мастер-классларны, разминканы һәм концерт программасын үз эченә алды.
Акция кысаларында сигез километр яр сызыгында 369 капчык чүп-чар җыелды, шулай ук 250гә якын агач – чыршы, юкә, каен, алмагач – утыртылды.
Эшләр тәмамлангач, барлык катнашучылар төшке аш белән сыйланды.
Шулай ук Россия Федерациясе Табигать ресурслары һәм экология министрлыгы «Россия суы» Бөтенроссия акциясен оештыруга һәм үткәрүгә зур өлеш керткән активистларны дипломнар белән билгеләп үтте.
Актив иҗтимагый эшчәнлек һәм яшьләрне экологик агартуга керткән өлеш өчен 41 нче урта гомуми белем бирү мәктәбе директоры киңәшчесе Гөлнара Гыйльметдинова; 35 нче урта гомуми белем бирү мәктәбе укытучысы Гөлшат Сәетова; «Орион» яшьләр үзәгенең яшьләр белән эшләү буенча белгече һәм «Эко-активлар» иҗтимагый оешмасы җитәкчесе Ксения Сыкрина, шулай ук Яр Чаллы шәһәре Алдынгылар хәрәкәтенең өлкән белгече һәм «Россия юннатлары» юнәлеше җитәкчесе Дарья Чучалина бүләкләнде.
Искәртеп үтәбез, «Экологик иминлек» милли проектының «Россия суы» федераль проектын гамәлгә ашыру кысаларында Россия Федерациясе табигать ресурслары һәм экология министры урынбасары Максим Корольков катнашында «Россия суы» Экологик съезды 16 апрельдән бирле дәвам итә.
Съезд башланганчы кунаклар шәһәр мэры Наил Мәһдиев озатуында Мәләкәс елгасын чистарту барышы белән танышты. Татарстан Республикасы экология һәм табигать ресурслары министры Азат Җиһаншин һәм Су ресурслары өлкәсендә дәүләт сәясәте һәм җайга салу департаменты директоры Александр Шадриков белән бергә елгадагы эшләрнең агымдагы торышы, төп утырмаларны алу темплары һәм чистартуның киләсе этапларына әзерлек турында фикер алыштылар.
Иртәгә, 18 апрельдә, Яр Чаллыда гомумшәһәр өмәсе узачак.