Бүген шәһәр мэры Наил Мәһдиев капиталь ремонт үткәрелгән “Көнбагышкай” балалар бакчасында булды. Балалар бакчасы Татарстан Республикасы Дәүләт Советы Рәисе урынбасары Марат Әхмәтов ярдәме белән татар телен саклау һәм үстерү республика программасы кысаларында 142,4 млн сумга ремонтланды.
82 нче номерлы “Көнбагышкай” балалар бакчасы 52 нче комплекста урнашкан. Ул 275 урынга исәпләнгән. Бинаның фасады яңартылды.
Эшләрне “Твой дом”" төзелеш компаниясе башкарды.
Капиталь ремонт кысаларында яңа җиһазлар сатып алынды.
Мәктәпкәчә учреждениедә шулай ук түбә ябу эшләре башкарылды, су белән тәэмин итү һәм канализация алмаштырылды, җылыту һәм вентиляция системалары ремонтланды, яңа тәрәзәләр һәм ишекләр урнаштырылды.
Балалар бакчасында 12 төркем эшли, шуларның икесе ясле, өчесе – логопед төркеме. Тәрбия татар телендә алып барыла.