2025 елда Татарстан Дәүләт алкоголь инспекциясе Яр Чаллыда алкоголь продукциясе әйләнешен контрольдә тоту һәм кулланучылар хокукларын яклау буенча киң колачлы эш башкарды, дип хәбәр итте Гөлшат Вафина. Шәһәрдә 743 лицензияле сәүдә объекты эшләде, бу узган ел белән чагыштырганда 15кә кимрәк, түбән рентабельлек аркасында 10 нокта ябылды.
Лицензияләү өчен дәүләт пошлинасы керемнәре 1,5 тапкыр артып, 8,3 млн сум тәшкил итте, узган ел бу 5,4 млн сум иде. 2025 елның 1 сентябреннән пошлина җыю тәртибе үзгәрде: хәзер ул эшчәнлекнең һәр урыны өчен һәм лицензиянең һәр елы өчен алына. Шәһәр оешмалары өчен пошлина күләме урын өчен елга 65 мең сум тәшкил итә.
Шушы елның 1 мартыннан җәйге кафелар урнаштыруга яңа таләпләр үз көченә керде: эш сезоны – 15 апрельдән 15 октябрьгә кадәр, ачу өчен инспекциянең бәяләмәсен алырга кирәк. Бәяләмә булмаган очракта штрафлар каралган: вазифаи затлар өчен – 20 меңнән 40 мең сумга кадәр, юридик затлар өчен – 100 меңнән 300 мең сумга кадәр.
2025 елда 804,8 мең декалитр алкоголь продукциясе сатылды (узган ел дәрәҗәсеннән 92%), шул исәптән республикада җитештерелгәне – 348,9 мең декалитр. Сыра һәм сыра эчемлекләре 4 523,4 мең декалитр сатылды (узган елның шул ук чорына 101%), шулардан җирле җитештерү – 1 239 мең декалитр. Татарстан бюджетына 26 млрд сум акциз керде (9%ка арту).
Контроль-инспекция эшчәнлеге сәүдә объектларында 197 күчмә тикшерүне үз эченә алды. Бер кибеттә (күпфатирлы йортның ишегалды ягыннан керү) бозулар ачыкланды, бу лицензияне яңадан рәсмиләштерүдән баш тарту өчен нигез булды. Планнан тыш тикшерүләр бары тик риск индикаторлары буенча һәм прокуратура белән килештереп кенә үткәрелде.
Тикшерүләр нәтиҗәләре буенча 333 мең сумлык штраф салынды, барысы да тулысынча түләттерелде. Алкогольсез тонизацияләүче эчемлекләр сату өлкәсендә 2 кисәтү игълан ителде һәм 1 профилактик визит үткәрелде.
Ел дәвамында гражданнарның 60 мөрәҗәгате каралды, кулланучылар хокукларын яклау мәсьәләләре буенча 1 602 консультация үткәрелде, судка кадәр тәртиптә 115 бәхәс җайга салынды (мөрәҗәгатьләр саныннан 98%), дәгъвалар төзүдә ярдәм күрсәтелде, республика мәгълүмат базасына 17 суд карары кертелде.
Халыкның грамоталылыгын күтәрү өчен 162 күчмә чара үткәрелде, шул исәптән социаль яктан зәгыйфь категорияләр һәм хезмәт ветераннары өчен, массакүләм мәгълүмат чараларында 280 материал бастырылды, мәктәп укучылары өчен 32 факультатив дәрес оештырылды. Кулланучылар хокукларын яклау буенча республика олимпиадасында 246 укучы катнашты, иң яхшылары дипломнар һәм рәхмәт хатлары белән билгеләп үтелде.
2026 елга өстенлекле бурычлар билгеләнде: алкогольнең законсыз әйләнешен кисү һәм җирле җитештерүчеләр продукциясен алга этәрү буенча бергәләп эшләү, цифрлы контроль системаларын куллану, кулланучылар хокукларын яклау программасын гамәлгә ашыру. Территориаль орган җитәкчесе Гөлшат Вафина кулланучылар базарындагы тәртип мәсьәләләренә битараф булмаганнары өчен рәхмәт белдерде:«Шәһәр Башкарма комитетына, контрольләүче һәм хокук саклау органнарына – шәһәр прокуратурасына, полициягә, Федераль салым хезмәте инспекциясенә, Кулланучылар хокукларын яклау һәм кеше иминлеге өлкәсендә күзәтчелек хезмәтенең территориаль бүлегенә һәм суд приставлары хезмәтенә нәтиҗәле хезмәттәшлек өчен рәхмәт белдерәм. Шулай ук безнең эшчәнлекне яктыртучы массакүләм мәгълүмат чараларына һәм битараф булмаган, бозуларны вакытында кисәтергә һәм ачыкларга ярдәм итүче шәһәр халкына рәхмәт сүзләремне җиткерәм».
Наил Мәһдиев район башлыкларына ышанып тапшырылган территорияләрдә хәлне контрольдә тотуны көчәйтергә кушты: «Район башлыклары, үз территорияләрегездә ниләр булуына – икеләтә максатлы продукция сату өлешендә, законнарны үтәү өлешендә булган бозуларга игътибар итегез. Бергәләп эшләүне алга таба да дәвам итәргә кирәк».